Björn Bjarnason hefur lengi verið einn harðasti andstæðingur Baugsfeðga. Má jafnvel segja að hann hafi haft þá á heilanum.

En þeir hafa líka svarað í sömu mynt. Jóhannes birti auglýsingar í blöðunum fyrir kosningarnar 2007 og hvatti fólk til að kjósa ekki Björn.

Reyndar segja sumir að það hafi virkað þveröfugt.

En það verður að segjast eins og er að málsókn á hendur Birni vegna smávægilegrar ónákvæmni í bókinni Rosabaugur er fáránleg

Björn hefur fyrir löngu leiðrétt þessar missagnir, þær breyttu engu fyrir heildarmyndina. Hún stendur eftir sem áður, enda er ekki kært fyrir hana.

Málsóknin er eingöngu liður í þeirri viðleitni að þagga niður í gagnrýnisröddum og komast hjá umræðu með sífelldu juði í lögfræðingum og fyrir dómstólum.

Þetta er aðferð sem íslenskir útrásarvíkingar hafa lært í Bretlandi – þar sem þeir halda mikið til – og er um hana fjallað í bók Nicks Cohen sem ég fjallaði um nýskeð.