Þegar þetta er skrifað hafa 17606 skrifað undir áskorun til Ólafs Ragnars Grímssonar um að bjóða sig enn einu sinni fram til embættis forseta.

Þetta er nokkur fjöldi, en þó vekur athygli að verulega hefur hægt á undirskriftasöfnuninni.

Gunnar Smári Egilsson reiknaði út á Facebook síðu sinni að fyrsta sólarhringinn hefðu bæst 332 stuðningsmenn við listann á hverjum klukkutíma, næsta sólarhring 223, síðan 100, en frá því í gær hafi aðeins bæst við 23 stuðningsmenn á klukkustund.

Hann segir að með þessu áframhaldi muni það taka einn og hálfan mánuð að koma fjöldanum upp í 40 þúsund.

Það er spurning hvað stuðningsmenn Ólafs Ragnars telja ásættanlegan árangur í undirskriftasöfnuninni – og hann sjálfur?

Það er ljóst að þetta er smærra í sniðum en þegar safnað var undirskriftum vegna Icesave – kannski er ekki von á öðru – en þarna eru engin ótvíræð skilaboð um að Ólafur Ragnar geti verið öruggur með endurkjör.