Í Kiljunni í kvöld verður fjallað um nýja ljóðabók eftir Matthías Johannessen sem nefnist Vegur minn til þin. Þetta er eitthvert sterkasta kvæðasafn sem hefur komið út á Íslandi síðustu ár.
Jón Óskar Sólnes segir frá nýrri bók eftir sig sem nefnist A Powderkeg in Paradise og fjallar um borgarastríðið á Sri Lanka, en Jón Óskar – sem er fyrrum fréttamaður á sjónvarpinu starfaði við friðargæslu þar og reyndar víðar í heiminum. Bókin er gefin út hjá forlagi á Indandi, en er dreift hér á landi af Veröld.
Bragi fjallar um einn huldumann íslenskra bókmennta, Geir Kristjánsson, en hann er fyrst og fremst þekktur fyrir öndvegisþýðingar á rússneskri ljóðlist.
En Kolbrún og Páll Baldvin ræða um Litla prinsinn eftir Antoine de Saint-Exupéry, eina vinsælustu bók í heimi, Nemesis eftir Norðmanninn Jon Nesbö og nýja útgáfu af Skugga-Baldri eftir Sjón, en hún er gefin út til að minnast þess að fimm ár eru síðan hann fékk bókmenntaverðlaun Norðurlandaráðs fyrir söguna.
