Það borgar sig fyrir stjórnmálamenn að bera sig vel undan háði. Helst kvarta aldrei.

Það getur reyndar haft mikil áhrif. Halldór Ásgrímsson kveinkaði sér undan Spaugstofunni og með nokkrum rétti. Hún fór illa með hann; hann leit út eins og auli í meðförum hennar. Varð mjög neikvæð fyrir stjornmálaferil hans.

Útgáfa Spaugstofunnar á Davíð Oddssyni var allt öðruvísi. Í túlkun Arnar Árnasonar leit hann út eins og sjarmerandi skelmir og ólíkindatól. Ég er ekki alveg viss um að það sé rétt túlkun á manninum. En hún hjálpaði stjórnmálamanninum fremur en hitt.

Nú er Ísland í dag að tala við fólkð sem fór verst út úr Skaupinu: Sigmund Erni, Sigmund Davíð, Margréti Tryggvadóttur.

Þau bera sig öll vel. Auðvitað. En þau fengu samt fyrir ferðina.

Jón Ásgeir hefur ekki verið spurður né Björgólfur Thor – og ekki heldur Ólafur Ragnar.

Hins vegar má benda á að höfundar skaupsins munu hafa fengið leyfi til að nota Bessastaði að einhverju leyti, þótt mikið af umhverfinu þar hafi á endanum verið gert í tölvu.