Hvað þýðir skýrsla rannsóknarnefndar fyrir hinn pólitíska veruleika á Íslandi?

Flestir sem maður hittir hrista hausinn, það virðist vera almenn niðurstaða að stjórnmálakerfið hérna sé meira og minna ónýtt.

Hvað geta stjórnmálamenn gert til að endurvinna traust? Ræður sem maður heyrði á Alþingi í dag voru sumpart tómt orðagjálfur, margir töluðu í tuggum og útjöskuðum frösum.

Og þannig virka orð stjórnmálamanna á fólk í dag. Það getur varla hlustað á þá. Afber það eiginlega ekki.

Alþingiskosningar voru haldnar fyrir ári. Margir sögðu að það væri of snemmt. Uppgjör eftir hrunið var rétt að byrja þá. Síðan hefur ýmislegt gerst, en stjórnmálin hafa einhvern veginn setið eftir. Þau ná ekki utan um veruleikann.

Því er varla von á öðru en að hún verði  háværari krafan um algjöra uppstokkun, nýja stjórnarskrá, nýja flokka eða þá að minnsta kosti gömlu flokkana með nýtt innihald og nýjar hugmyndir.