Laura Smith, 25 ára, er frá Michigan í Bandaríkjunum. Hún gefur enn sonum sínum, Joel og Bennett, brjóst allt að þrisvar sinnum á dag.
Joel er fimm ára og Bennett er tveggja ára. Hún fær reglulega að heyra það að „það sé ógeðslegt“ að hún sé enn að gefa Joel brjóst, en lætur það ekki stoppa sig. Fabulous Digital greinir frá.
Laura heldur því fram að synir hennar hafi aldrei fengið flensu né farið til læknis þökk sér næringunni úr brjóstamjólkinni. Hún vill losna við þá skömm sem hún segir að loði við brjóstagjöfina.
„Ég vil hvetja fleiri mæður til að gefa börnum sínum brjóst, sama hver aldur þeirra er. Synir mínir eru mjög heilbrigðir og við höfum sérstaka tengingu vegna hennar,“ segir hún.
„Ég held að ég myndi persónulega vilja hætta þegar þeir verða átta ára. En ef þeir myndu vilja halda áfram þá myndi ég ekki segja nei við þá. Þegar þeir eru tilbúnir að hætta þá gerum við það.“
Móðir Lauru gaf henni og fjórum systkinum hennar brjóst þar til þau voru fjögurra og fimm ára gömul.
„Löng brjóstagjöf er algeng í minni fjölskyldu,“ segir hún og bætir við að eiginmaður hennar og fjölskylda hafa verið mjög stuðningsrík en þó hafi ekki allir vinir hennar hafa verið það.
Þegar yngri sonur Lauru fæddist, Bennett, varð Joel mjög afbrýðisamur.
„Það var mjög erfitt að segja nei við Joel þegar hann vildi brjóst, því ég þurfti að gefa Bennett. Fyrir það höfðum aðeins við tvö deilt þessu saman, þannig það var mikil afbrýðissemi. Ég held að Joel hafi verið afbrýðisamur út í nándina, frekar en mjólkina sem Bennett var að fá.“
Laura segist stundum vera hikandi að gefa Joel brjóst á almannafæri. „Hann er orðinn svo stór og ég fæ virkilega illt auga frá ókunnugum. Sumir hafa sagt við mig að þetta sé ógeðslegt,“ segir hún.
„Mér finnst það mjög kjánalegt hvernig fólk getur verið svona á móti einhverju sem er svo fallegt og náttúrulegt. Ég forðast að gefa þeim brjóst í verslunarmiðstöðvum þar sem svo margt fólk er á ferli og ég nenni ekki þessu drama.“
