Á tímum samkomubanns er óráðið að fara í klippingu eða annars konar snyrtingu, enda erfitt að tryggja tveggja metra fjarlægð á milli viðskiptavinar og þjónustuaðila. Því eru hárgreiðslustofur og aðrar snyrtistofur lokaðar á meðan Covid-19 óværan gengur yfir.

Þá grípa margir til skæranna, þá sérstaklega þeir sem þola illa hárlubbann í andlitinu. Fólki ferst verkið hinsvegar misvel í höndum og þegar klippt hefur verið, þá reynist oft erfitt að fara til baka…

Einn af þeim sem mundaði skærin nýlega var hann Björn Þorfinnsson, blaðamaður hjá Fréttablaðinu en hann birti fyrir stuttu mynd af árangrinum.

„Í mikilli neyð ákvað ég að fara að ráðum vinar míns (og örvita) sem fullyrti að það væri ekkert mál að klippa sig sjálfur. Ég vandaði mig eins og ég gat en endaði með Dumb & Dumber pottlok. Hér er komin ástæða þess að ég nota ekki myndavélina á símafundum í vinnunni. Blessunarlega mun þetta samkomubann vara eitthvað áfram…“

Björn Þorfinnson er fyrrum blaðamaður DV. Gaf hann gömlum vinnufélögum sínum góðfúslegt leyfi fyrir myndbirtingunni. 

Hárharmleikur

Að sögn er Björn ekki mjög sáttur með útkomuma en það er ljós í myrkrinu. „Ég er búinn að fá skeyti frá hárgreiðslustofunni Yellow þar sem þau buðu fram aðstoð sína til þess að bjarga þessum hárharmleik – eftir að samkomubanni lýkur. Það þótti mér vænt um enda stöndum við Íslendingar saman þegar eitthvað bjátar á,“ segir Björn.

Björn er ekki sá eini sem hefur gripið til slíkra örþrifaráða sem heimaklipping er. Grínistinn Jeff Dunham rakaði nýlega hvert einasta hársnifsi af höfði sínu og virðist sáttur með ákvörðunina.

„Tja… Í gær ákvað ég að þetta væri betra en slæm klipping…“

https://www.facebook.com/JeffDunham/photos/a.10152092544788827/10158235445318827/?type=3&theater&hc_location=ufi