Á miðvikudag varð hörmulegt slys í Nottingham-skíri á Englandi er 14 ára drengur, Joshua Travis, varð fyrir járnbrautarlest.
Lögregla og sjúkralið fór á vettvang skömmu eftir að tilkynnt var um slysið en Joshua reyndist vera látinn. Ekki er talið að andlát hans hafi borið að með saknæmum hætti en ekki hafa verið veittar frekar upplýsingar um hvað olli því að hann var staddur á lestarteinunum þegar lestin fór hjá.
Foreldrar Joshua sendu frá sér meðfylgjandi mynd af honum auk yfirlýsingar. Þar segja þau að hann hafi verið fullur af lífsorku og smitandi lífsgleði.
Þess má geta að Joshua lék sem markvörður í unglingaakademíu Nottingham Forest liðsins og þótti vera efnilegur knattspyrnumaður. Félagið hefur sent frá sér yfirlýsingu þar sem segir Joshua hafi verið frábær markvörður og mikill persónuleiki í liðshópnum. Hann hafi haft indæla nærveru og skemmtilegan húmor. Hans er afar sárt saknað í félaginu.
