Leikarinn Zac Efron er einn af hjartaknúsurum heimsins og hefur slegið sér upp með ýmsum konum á hvíta tjaldinu. Leikkonan Ashley Tisdale ljóstrar því hins vegar upp í nýju viðtali við tímaritið Elle að kossinn hennar og Zac í The Suite Life of Zack & Cody væri hennar versti á ferlinum.
„Ég skal segja ykkur af hverju hann var verstur, ókei?“ hefur Ashley frásögnina. „Þetta er versti kossinn því við erum svo náin og hann [Zac] er eins og bróðir minn. Á þessum tíma var hann vanur að leika fyrir Warner Bros en við vorum að leika saman í þætti fyrir Disney-rásina,“ heldur Ashley áfram, en þau Zac urðu góðir vinir við gerð fyrstu High School Musical-myndarinnar.
„Hann reyndi að kyssa mig með tungunni og ég sagði: Farðu burt frá mér. Ég lokaði munninum á leifturhraða og sagði: Þetta er Disney-rásin! Við kyssum ekki svona á Disney-rásinni! Það er bara skrýtið þegar maður er svona náinn einhverjum. Við höfðum gert High School Musical. Ég hafði þekkt hann í áraraðir. Þess vegna er þetta versti kossinn. Við vorum bara of náin,“ segir leikkonan.
Ashley og Zac léku í tveimur öðrum High School Musical-myndum og eru enn góðir vinir í dag.