Unglingsstúlkan Lara Sanson frá Argentínu þurfti að láta sauma 40 spor í andliti sínu eftir að hundur beit hana. Lara var að stilla sér upp á mynd með hundi vinkonu sinnar og hélt utan um hann. Skyndilega sneri hundurinn sér við og beit hana í andlitið. Hundurinn er þýskur fjárhundur (e. german shepherd).
Lara, 17 ára, deildi nýlega myndunum af atvikinu á Twitter. Fyrst má sjá hana brosa og halda utan um hundinn og síðan má sjá hundinn bíta hana.
Hún skrifaði með færslunni: „Misheppnuð myndataka.“
Lara þurfti að gangast undir tveggja klukkutíma aðgerð og sauma þurfti spor í andlit hennar, munn og góm hennar.
Hún segist ekki hafa fundið fyrir miklum sársauka þegar hundurinn beit hana og hún trúir því ekki að hundurinn hafi ætlað sér að bíta hana.
„Ég veit ekki hvort þetta var vegna þess að ég snerti mjöðmina hans eða vegna þess að hann er gamall, eða því ég knúsaði hann og hræddi hann,“ sagði Lara í samtali við argentínska dagblaðið La Nacion. Hún sagði að hundurinn verður ekki svæfður eftir árásina.
Lara er að ná góðum bata en á erfitt með að borða.
Færslan hefur vakið mikla athygli á Twitter.
„Það ætti aldrei að taka utan um hund um háls hans. Ekki setja andlitið nálægt honum því eðlishvöt hans segir að þú ætlir að ráðast á hann. Hálsinn er viðkvæmasti staður hundsins. Ánægð að það fór ekki verr,“ skrifaði einn netverji.
Sesión de fotos con Kenai sale mal pic.twitter.com/gYU76iGGFC
— •Lara• (@LaruSanson) January 14, 2020