Öll eigum við okkar góðu og slæmu stundir; stundum erum við hamingjusöm en stundum líður okkur verr og finnst okkur synda sífellt gegn straumnum. Aldurinn virðist hafa nokkuð að segja um þetta, að minnsta kosti ef marka má niðurstöður vísindamanna.
Niðurstöður þeirra eru þær að við erum hvað óhamingjusömust á æviskeiðinu þegar við erum nákvæmlega 47,2 ára. Vísindamenn við Dartmouth College í New Hampshire í Bandaríkjunum báru saman gögn frá 132 löndum þar sem búið var að kanna velferð og lífshamingju fólks. Þessi gögn voru svo skoðuð nánar út frá aldri svarenda þar sem þessi niðurstaða fékkst.
David Blanchflower er einn þeirra vísindamanna sem stóð að baki grein um samanburðarrannsóknina. Hann útskýrir þessa tölu, 47,2, á þann veg að þá fari hvatning eða metnaður fólks dvínandi, til dæmis með tilliti til menntunar og starfsferils.
Góðu fréttirnar eru þær að lífshamingjan virðist fara vaxandi aftur eftir fimmtugt.