Kristín Margrét fann fyrir þörf að koma skilaboðum áleiðis til verðandi foreldra og foreldra ungra barna eftir að hafa dvalið nótt á vökudeildinni með fjögurra daga gamla dóttur sína.
Hún deildi þeim á Facebook og gaf DV góðfúslegt leyfi til að deila áfram með lesendum, enda um gríðarlega mikilvæg skilaboð að ræða.
Kristín Margrét rifjar upp atvikið þegar hún missti næstum dóttur sína.
„Við mæðgur vorum tvær inn í stofu og sú litla var að fá brjóst. Hún blánaði skyndilega upp og hætti að anda. Ég kallaði í pabba hennar sem kom hlaupandi og tók hana í fangið og reyndi að ná sambandi við hana. Þá allt í einu byrjaði að kurra í henni eins og hún væri að reyna að ná andanum. Pabbi hennar snýr henni við og upp úr henni gusast mjólk sem hafði farið öfuga leið ofan í hana og lokað öndunarveginum.
Hún varð aftur sjálfri sér lík eftir þetta en svaf mun meira en hún er vön. Þannig við hringdum í barnalækni sem vildi fá hana í skoðun. Hún var í alls konar rannsóknum [aðfaranótt þriðjudags] og alveg fram á [þriðjudag]. Það er hundrað prósent í lagi með hana,“ segir Kristín Margrét.
„En það sem ég vildi koma á framfæri er mikilvægi þess að fara á skyndihjálparnámskeið. Við fórum á svoleiðis á meðgöngunni og það bjargaði hugsanlega lífi dóttur okkar í gær. Ég vil ekki hugsa til þess að við hefðum sleppt því og ekki vitað hvað við ættum að gera.“
Að lokum þakkar Kristín Margrét barnaspítalanum fyrir framúrskarandi þjónustu og umönnun .“Ekki bara á barninu heldur okkur foreldrunum líka. Þvílíkt fagfólk sem þar vinnur,“ segir hún.
