Héraðssaksóknari hefur ákært tvo menn fyrir kynferðisbrot framin í félagi að nóttu einhvern tíma á síðasta ári.
Mennirnir eru sakaðir um að hafa haft samræði við stúlku undir lögaldri án hennar samþykkis og að hafa þar nýtt sér ölvunarástand hennar svo hún gat ekki spornað við verknaðinum. Brotið var framið í herbergi á þáverandi dvalarstað stúlkunnar. Í ákærunni er þetta orðað svo:
„Nauðgun, með því að hafa báðir haft samræði og ákærði X einnig haft önnur kynferðismök við A, án hennar samþykkis og beitt hana ólögmætri nauðung með því að notfæra sér ölvunarástand hennar, en ákærði X klæddi hana úr buxum og nærbuxum, stakk fingrum sínum í leggöng hennar, hafði við hana munnmök og samræði, þar sem hún lá sofandi í rúmi sínu og ákærði Y hafði við hana samræði skömmu síðar, en A gat ekki spornað við verknaðinum sökum ölvunar og svefndrunga.“
Mennirnir eru jafnframt ákærðir fyrir að hafa útbúið myndskeið af nauðguninni án samþykkis eða vitneskju brotaþolans.
Móðir stúlkunnar gerir kröfu um miskabætur fyrir hennar hönd að fjárhæð sex milljónir króna.
Málið var þingfest við Héraðsdóm Reykjaness í gær, 2. apríl.
