Maður sem dæmdur var í sex ára fangelsi fyrir manndráp en fékk reynslulausn þegar hann átti eftir 1450 daga óafplánaða af refsingunni, hefur rofið skilyrði reynslulausnar og þarf að sitja af sér eftirstöðvar refsingarinnar.
Landsréttur hefur staðfest úrskurð Héraðsdóms um þetta.
Athygli vekur að maðurinn hafi fengið reynslulausn svo snemma en hann átti eftir að afplána fjögur af sex árum dómsins.
Maðurinn var fyrr á árinu handtekinn í þágu rannsóknar lögreglu á smygli á tæpu kílói af maríhúana. Í skýrslutöku hjá lögreglu greindi annar maður frá því að hinn kærði hefði beðið hann um að taka við fíkniefnasendingunni og hafi ætlað að greiða honum fyrir verkið. Lagði sá maður fram gögn um skrifleg samskipti þeirra þar sem kærði upplýsti sendilinn um sendingarnúmer á póstsendingunni.
Það er almennt skilyrði reynslulausnar að menn gerist ekki sekir um nýtt brot á reynslutíma. Grunur um sekt mannsins er nægilega sterkur til að bæði héraðsdómur og Landsréttur telja að hann hafi rofið skilyrði reynslulausnar og þarf hann því að sitja af sér dóminn fyrir manndrápið.
Úrskurðina má lesa hér.
