Lögreglan á Suðurlandi hefur upplýst í tilkynningu að fjórir séu nú í gæsluvarðhaldi vegna manndrápsmálsins sem hefur verið til rannsókar að undanförnu og varðar heiftarlega hópárás á 65 ára gamlan mann frá Þorlákshöfn.
Fjórði sakborningurinn var úrskurðaður í gæsluvarðhald í dag og eru nú fjögur í gæsluvarðhaldi, tveir karlar og tvær konur. Annar karlmannanna er landsþekktur brotamaður, Stefán Blackburn, 34 ára gamall.
Fimmti aðilinn, karlmaður, er einnig í haldi lögreglu vegna rannsóknar málsins og verður krafist gæsluvarðhalds yfir honum.
Í tilkynningunni segir:
„Héraðsdómur Suðurlands féllst í dag á kröfu lögreglustjórans á Suðurlandi um að konu yrði gert að sæta gæsluvarðhaldi í eina viku vegna rannsóknar á máli er lögregla hefur haft til rannsóknar frá því sl. mánudagskvöld og varðar frelsissviptingu, fjárkúgun og manndráp.
Alls sæta nú fjórir aðilar, tveir karlar og tvær konur, gæsluvarðhaldi vegna rannsóknar málsins. Síðar í kvöld mun fimmti aðilinn, karlmaður sem handtekinn var í gærkvöldi, verða leiddur fyrir dómara og krafist gæsluvarðhalds yfir honum.
Landsréttur staðfesti fyrr í dag gæsluvarðhaldsúrskurð Héraðsdóms Suðurlands frá því á miðvikudag yfir þeim tveim aðilum sem kærðu úrskurðina til Landsréttar.
Rannsókn málsins miðar vel og heldur áfram af fullum þunga. Vegna rannsóknarhagsmuna er ekki unnt að veita nánari upplýsingar í málinu að svo stöddu.“
Lögreglan á Suðurland hefur tilkynnt að Héraðsdómur Suðurlands hafi fallist á kröfu um gæsluvarðhald yfir karlmanni. Er þar með fimm manns í gæsluvarðhaldi vegna málsins. Í tilkynningunni segir:
„Nú undir kvöld féllst dómari Héraðsdóms Suðurlands á kröfu lögreglustjórans á Suðurlandi um að karlmaður skyldi sæta gæsluvarðhaldi í eina viku. Þetta er fimmti aðilinn sem hefur verið úrskurðaður í gæsluvarðhald vegna rannsóknar lögreglu á meintri frelsissviptingu, fjárkúgun og manndrápi.“
