Erlendir ferðamenn tóku til fótanna þegar þeir töldu sig hafa fundið fyrir reimleikum á lúxushóteli Skúla Mogensen við Hvammsvík. Veðrið var mjög slæmt þessa nótt.
Ferðamennirnir greina frá þessu í færslu á samfélagsmiðlum, í hópi þar sem ferðamenn deila ráðum um Ísland.
„Hefur einhver gist í Sjóböðunum í Hvammsvík á Íslandi, húsunum á hæðinni og upplifað kynni af draug eða einhvers konar yfirnáttúrulegu veru?“ spyr ferðamaðurinn á síðunni og birtir mynd af húsinu úr fjarlægð, sem verður að segjast að er nokkuð draugaleg.
Lýsir hann atvikinu sem skeði fyrir hópinn eina óveðursnótt.
„Við vorum svo hrædd að við fórum á fætur um miðja nótt, skömmu eftir að við fórum að sofa á þriðju nóttinni, pökkuðum saman og hlupum út úr húsinu um klukkan fjögur í hræðilegu veðri. Við gátum ekki séð en við hlupum til að bjarga lífi okkar.“
Segir ferðamaðurinn að hópurinn sé í losti eftir þetta. En hann segist ekki vilja móðga eigendur hússins, það hafi verið gullfallegt.
Færslan hefur eins og gefur að skilja fengið mikil viðbrögð. Ekki eru allir sannfærðir um að hópurinn hafi raunverulega fundið fyrir vofum á hæðinni við Hvammsvík.
„Draugar eru ekki til,“ segir einn netverji í athugasemdum.
„Hættið að borða sveppi!,“ segir annar vantrúaður.
Einn kemur með líklega skýringu á atvikinu. Það er að það tengist náttúrulegum en ekki yfirnáttúrulegum orsökum.
„Þú minntist á veðrið. Vindur og snjókoma geta skapað mikinn hávaða. Húsið er á hæð og berskjaldað fyrir náttúrunni. Ég hef verið í snjóstormum á stöðum eins og þessum og alla nóttina heyrði maður í diskum smella utan í húsið vegna vindsins og snjókomunnar,“ segir hann. „Mér fannst líka eins og húsið sjálft væri að hreyfast.“
