Að minnsta kosti 28 eru slasaðir eftir að bifreið var ekið á hóp fólks í þýsku borginni Munchen í morgun. Hinn grunaði er talinn hafa ekið á fólkið af ásettu ráði en hann er 24 ára hælisleitandi frá Afganistan, að sögn lögreglu.

Atvikið átti sér stað á Seidlstrasse klukkan 10:30 að staðartíma en hópurinn sem ekið var á hafði komið saman til samstöðufundar á vegum verkalýðsfélagsins Verdi. Meðal hinna slösuðu mun vera ung móðir og barn hennar sem var í kerru þegar ekið var á þau.

Lögregla yfirbugaði ökumanninn fljótlega eftir atvikið og þá hefur hún staðfest að lögreglumenn hafi skotið á bílinn þegar ljóst var hvað ökumaðurinn ætlaði sér.

Mikil ringulreið myndaðist eftir atvikið að sögn sjónarvotta. „Fólk sat á götunni og grét og skalf,“ sagði þýska blaðakonan Sandra Demmelhuber.