Gabriel Silva Sarmiento, 43 ára gömlum manni, hefur verið birt fyrirkall og ákæra í Lögbirtingablaðinu vegna þess að ekki hefur tekist að birta honum ákæru í mjög alvarlegu sakamáli.
Gabriel er ákærður fyrir stórfellt fíkniefnalagabrot og sakaður um að hafa flutt til landsins tæplega 2 kg af kókaíni. Efnin voru falin í ferðatösku Gabriels er hann kom hingað til lands í nóvember árið 2019 sem farþegi með farþegaflugvél frá Edinborg í Skotlandi.
Athygli vekur hvað langt er síðan meint brot var framið, eða vel yfir fimm ár.
Í fyrirkallinu segir:
„Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing, við þingfestingu máls eða á síðari stigum þess, má hann búast við því að fjarvist hans verði metin til jafns við það að hann viðurkenni að hafa framið brot það sem hann er ákærður fyrir og dómur verði lagður á málið að honum fjarstöddum.“
Málið verður þingfest við Héraðsdóm Reykjaness þann 1. apríl næstkomandi.
