Donald Trump sparaði ekki stóru orðinn á miðvikudaginn þegar hann kynnti fyrirhugað milljarða verkefni sem hefur fengið nafnið „Stargate“. Hann sagði verkefnið, sem er unnið í samstarfi ríkisins, OpenAI, Softbank og Oracle, vera „stórkostlegt“ og „frábært“. Verkefnið snýst um fjárfestingar í gervigreind og verður 500 milljörðum dollara varið í það.
En Musk, sem er einn helsti stuðningsmaður Trump, var ekki hrifinn af kynningunni á verkefninu og setti sig strax í stellingar við að gagnrýna á samfélagsmiðli sínum X. „Þeir eiga ekki peninga fyrir þessu,“ skrifaði hann.
Politico segir að þessi athugasemd hafi fallið í grýttan jarðveg í Hvíta húsinu. Ónafngreindur heimildarmaður sagði miðlinum að starfsfólk Trump hafi verið öskureitt vegna ummælanna.
Annar heimildarmaður sagði að Musk hafi fram að þessu nýtt náið samband sitt við Trump til hins ýtrasta.
Reuters hefur eftir ónafngreindum ráðgjafa Trump að þetta gæti hafa markað upphafið á endinum að hinu nána sambandi Trump og Musk en Musk á meðal annars að stýra vinnunni við hagræðingu í ríkisrekstri.
OpenAI, sem tekur þátt í Stargate-verkefninu, er í eigu Sam Altman. Hann og Musk hafa tekist opinberlega á um stjórnun AI en þeir komu báðir að stofnun fyrirtækisins. Musk hefur verið viðriðin fjölda málsókna á hendur fyrirtækinu.
Altman sat ekki þegjandi undir gagnrýni Musk um að fyrirtækin, sem taka þátt í Stargate-verkefninu, eigi ekki peningana sem þau hafa lofað í verkefnið og skrifaði á X: „Rangt eins og þú veist örugglega. Þetta er frábært fyrir landið. Ég veit að það sem er gott fyrir landið er ekki alltaf það besta fyrir fyrirtækin þín, en ég vona að í hinu nýja hlutverki þínu munir þú setja hagsmuni Bandaríkjanna ofar öllu.“
