Meira en áttatíu skemmtiferðaskipakomur hafa verið afbókaðar í janúar og mánuðurinn er ekki búinn. Skipafélögin afbóka til þess að mótmæla nýju innviðagjaldi sem þau telja ósanngjörn.
Vefmiðillinn The Travel greinir frá þessu.
Hið nýja gjald tók gildi um áramótin en það er 2.500 krónur á hverja nótt hjá hverjum farþega skemmtiferðaskipa. Þetta er fimmföldun á því sem skipafélögin þurftu að greiða áður fyrir hvern farþega.
Yfir 80 skipakomur hafa verið afbókaðar í janúar og mánuðurinn er ekki búinn. Búist er við frekari afbókunum víða um landið. Á Akureyri er búist við 44 afbókunum, 10 í Vestmannaeyjum og 7 í Grundarfirði svo dæmi séu tekin.
Stjórnvöld gerðu ráð fyrir að hin nýju gjöld myndu hala inn um 1,5 milljarði króna í ríkiskassann en miðað við afbókanirnar eru þær áætlanir í uppnámi.
Ástæðan fyrir því að skipafélögin hafa afbókað í staðinn fyrir að velta gjaldinu út í miðaverðið er að þau vilja helst ekki hafa nein „falin gjöld“ inni í verðmiðanum. Hinn möguleikinn er að skipafélögin taki gjöldin á sig sjálf og þá minnkar gróðinn. Hafa þau mörg hver því frekar ákveðið að sleppa því að sigla til Íslands, bæði af fjárhagslegum ástæðum og til þess að mótmæla gjaldinu.
