Irving Alexander Guridy Peralta, 29 ára, hef­ur verið dæmd­ur í tveggja ára fang­elsi fyr­ir stór­fellda lík­ams­árás sem varð Karol­is Zelen­kauskas að bana. Dómurinn er skilorðsbundinn til þriggja ára.

Árásin átti sér stað aðfaranótt laug­ar­dags­ins 24. júní 2024  á skemmti­staðnum Lúx við Aust­ur­stræti. Hinn látni var 25 ára og frá Lit­há­en.

Sjá einnig: Staðfest að banamein Karolis var eitt höfuðhögg

Irving var ákærður „fyrir stórfellda líkamsárás sem leiddi til dauða, með því að hafa aðfaranótt laugardagsins 24. júní 2023, inni á skemmtistaðnum Lúx við Austurstræti 7 í Reykjavík, fyrirvaralaust slegið A, kennitala […] , eitt högg efst á vinstri hluta hálsins, aftan við vinstra eyrað, þannig að hann fékk slink á höfuðið, en afleiðingarnar voru þær að hann lést af völdum altæks heiladreps vegna innanskúmsblæðingar af völdum rofs á vinstri aftari neðri hnykilsslagæðinni.“

Mbl.is greinir frá og hefur eftir Dag­mar Ösp Vé­steins­dótt­ur, sak­sókn­ara hjá héraðssak­sókn­ara, að maðurinn hafi játað verknaðinn og því var ekki talin þörf á aðalmeðferð.

Í dómsniðurstöðu kemur fram að ákærði á engan sakaferil að baki. „Málið er um margt óvenjulegt þar sem ákærði veitti brotaþola eitt lófahögg með þeim hörmulegu afleiðingum að brotaþoli lét lífið. Gögn málsins bera það með sér að brotið hefur verið ákærða þungbært og hefur hann glímt við einkenni alvarlegs kvíða og þunglyndis, auk áfallastreitu, í kjölfarið. Við ákvörðun refsingar verður ekki litið fram hjá hversu alvarlegar afleiðingar hlutust af broti ákærða. Ekki verður talið að framkoma hins látna hafi gefið tilefni til árásarinnar, sem samkvæmt upptöku úr eftirlitsmyndavél virðist hafa verið fyrirvaralaus. Á hinn bóginn verður litið til þess að ákærði hafði ekki ásetning til þess að vinna brotaþola slíkt tjón sem raun varð og afleiðingarnar urðu mun alvarlegri en höggið gaf tilefni til og verða metnar honum
til gáleysis.“

Dóm­ur var kveðinn upp í mál­inu 30. des­em­ber en dómurinn var birtur á vef dómstólana í dag.