María Rut Kristinsdóttir, nýr þingmaður Viðreisnar í Norðvesturkjördæmi, skammar fyrri ríkisstjórn fyrir slæma stjórnsýslu þegar hún setti hátt innviðagjald á skemmtiferðaskip. Það sé ekki vönduð stjórnsýsla að keyra slík mál í gegn án fyrirvara eða samráðs við greinina.
María Rut skrifar um þetta í grein í Morgunblaðinu í dag. Tilefnið var viðbrögð fólks úr ferðaþjónustunni sem hún ræddi við á Mannamóti markaðsstofu landshlutanna, sem er hluti af hinni árlegu Ferðaþjónustuviku.
Hún segist hafa fundið fyrir miklum áhuga fólks á að ræða við hana um stöðu greinarinnar og mikilvægi þess að byggja enn frekar undir hana. Sérstaklega þegar komi að fyrirsjáanleika og gagnsæi ákvarðana.
„Þar nefndu margir við mig hversu illa kveðjugjöf síðustu ríkisstjórnar hafi komið við greinina þegar ákveðið var í flýti að skella innviðagjaldi á skemmtiferðaskip,“ segir María Rut. Það er ákvörðun sem keyrð var í gegn við afgreiðslu fjárlaga í október. „Það var ekki endilega það að tekin hafi verið ákvörðun um gjaldtöku sem stóð í fólki. Heldur óðagotið og asinn. Enda hefur ákvörðunin þegar haft í för með sér afbókanir og fjárhagslegt tjón. Sérstaklega í smærri sveitarfélögum eins og Vesturbyggð, Árneshreppi og í Grundarfirði. Sömu raddir heyrast nú frá Djúpavogi, Grenivík, Höfn, Seyðisfirði og víðar.“
Þessu innviðagjaldi hafi verið ætlað að jafna samkeppnisstöðu fyrirtækja í ferðaþjónustu. En gjaldið er 2.500 krónur á nótt á hvern farþega. Í landi er gjaldið hins vegar aðeins 800 krónur á hvert herbergi. Hjón greiði því 5.000 krónur fyrir nóttina í skemmtiferðaskipi en langtum minna sé gist í landi.
„Burtséð frá því hvað okkur kann að finnast um slíkar gjaldtökur þá er í mínum huga alveg skýrt að það er ekki vönduð stjórnsýsla að keyra slík mál í gegn án fyrirvara eða samráðs,“ segir María Rut. „Tala nú ekki um þegar um er að ræða atvinnustarfsemi sem reiðir sig á verðskrár og bókanir langt fram í tímann.“
Fyrir landsbyggðina skipti öllu máli að vera með fleiri egg í körfunni þegar komi að atvinnuuppbyggingu. Þar skipti ferðaþjónusta og menningartengd starfsemi lykilhlutverki.
„Stjórnvöld eiga að vinna með greininni að þeirri uppbyggingu, en ekki bregða fyrir hana fæti í einhverju óðagoti,“ segir hún.
