Tæland er að verða einn helsti áfangastaður samkynja para sem vilja giftast. Þrátt fyrir að hafa mjög líflegt hinsegin næturlíf vilja ferðaþjónustufyrirtæki ekki markaðssetja Pattaya sem áfangastað.

Pattaya Mail greinir frá þessu.

Ýmis ferðaþjónustufyrirtæki hafa stokkið á vagninn og auglýst Tæland sem vettvangs giftingar samkynja para. Boðnir eru lúxus ferðapakkar og bent á vinsamlegt viðmót heimamanna.

Ferðaþjónustufyrirtæki á borð við Pure Bliss bjóðast til að sjá um allt saman. Meðal annars myndbandsupptöku af giftingarathöfninni og blómaskreytingar.

Bangkok, Phutket, Chiang Mai, Hua Hin og fleiri staðir eru listaðir sem áfangastaðir en ekki Pattaya, einn þekktasti ferðamannastaður Tælands þar sem hinsegin næturlíf er mjög virkt.

Eitt ferðaþjónustufyrirtækið sem býður upp á giftingar í Bangkok og Phuket tekur sérstaklega fram að Pattaya hafi of subbulegt orðspor á sér til þess að teljast vettvangur þar sem fólk hnýtir hnút sem á að duga út lífið.

„Það er ljóst að ferðamannastofa Tælands á mikið verk fyrir höndum að markaðssetja Pattaya sem stað fyrir samkynja pör að gifta sig í,“ segir í fréttinni.