Lögreglustjórinn á höfuðborgarsvæðinu neyddist til að fá mann úrskurðaðan í gæsluvarðhald svo hægt væri að koma honum úr landi. Það hafði verið árangurslaust reynt frá því í byrjun september árið 2020.

Þessa sögu má lesa úr gæsluvarðhaldsúrskurði Landsréttar og Héraðsdóms sem birtur var á vefsíðu Landsréttar í dag. Á Þorláksmessu staðfesti Landsréttur úrskurð Héraðsdóms Reykjavíkur um að maðurinn skyldi sæta gæsluvarðhaldi til 3. janúar. Gæsluvarðhaldið var talið nausðynlegt svo hægt væri að framfylgja úrskurði Útlendingastofnunar um brottflutning mannsins frá landinu.

Maðurinn var handtekinn þann 19. desember 2024 vegna rannsóknar máls þar sem hann er grunaður um að hafa móttekið póstsendingu sem innihélt fíkniefni. Kom þá í ljós að Útlendingastofnun hafði úrskurðað 2. september 2020 að manninum skyldi brottvísað frá landinu og hann sæta endurkomubanni. Honum var gert fimm sinnum að sæta tilkynningaskyldu en sinnti henni aldrei. Átti hann að tilkynna sig á lögreglustöð en bar því við að það væri ekki hans starf heldur væri það hlutverk lögreglu að leita að honum. Hefur maðurinn verður eftirlýstur hjá lögreglu síðan í desember 2022.

Í lagarökum lögreglustjóra í málinu segir:

„Að mati lögreglu hefur varnaraðili sýnt vilja sinn um undankomu brottvísunar í verki, en hann hefur ekki virt ákvörðun lögreglustjóra um að sinna reglulegri tilkynningarskyldu né ákvörðun Útlendingastofnunar um brottvísun og endurkomubann frá Íslandi frá 2. september 2020. Í málinu liggur óumdeilt fyrir að varnaraðila hefur verið vísað á brott frá Íslandi og er það mat lögreglustjóra að nauðsynlegt sé að hann sæti gæsluvarðhaldi til að tryggja framkvæmt þeirrar ákvörðunar, sbr. g-lið 1. mgr. 115. gr. útlendingalaga nr. 80/2016. Lögregla telur miklar líkur á því að varnaraðili láti sig hverfa áður en ákvörðunin verður framkvæmd, svo sem hann hefur þegar sýnt í verki.“

DV hefur ekki upplýsingar um hvort búið sé að koma manninum úr landi en gæsluvarðhaldsúrskurðurinn rann út 3. janúar. Einnig kann að vera að gæsluvarðhaldið hafi verið framlengt en ekki liggja fyrir upplýsingar um það.

Úrskurðina má lesa hér.