Þann 3. janúar síðastliðinn var Jóhannes Birkir Guðvarðarson á leið í göngutúr umhverfis Elliðavatn þegar hann rak augun í skarf í ætisleit í tjörn nærri verslun Bónus í Norðlingaholti. Jóhannes skaust inn í verslunina og keypti brauð sem hann síðan reif niður og henti til skarfsins og annarra fugla. Skarfurinn sýndi brauðinu lítinn áhuga og dundaði sér við að veiða sér smávaxna fiska til matar. En skyndilega stakk hann sér niður á bólakaf og kom aftur upp á yfirborðið með stærðarinnar gullfisk í kjaftinum.

Blessunarlega var Jóhannes með með myndavél meðferðis og náði ótrúlegum myndum af skarfinum sporðrenna bráð sinni. Hann birti myndirnar á Facebook-síðunni Fuglar á Íslandi, þar sem þær hafa vakið mikla athygli í dag, og veitti DV góðfúslegt leyfi til að birta þær.

Að sögn Jóhannesar rennur volgt vatn í umrædda tjörn allt árið um kring og er nokkuð um fuglalíf í kringum hana en hann hafði ekki tekið eftir gullfiskum í tjörninni fyrr en að skarfurinn sýndi bráð sína. Ætla má að einhver hafi losað sig við gæludýrið sitt í tjörnina en ekki er gott að segja um hvort að fiskurinn hafi braggast þarna um eitthvað skeið.

„Þetta var alveg magnað augnablik,“ segir Jóhannes sem náði á annan tug mynda af skarfinum matast.