Indversk stjórnvöld hafa aflétt banni á bókina Söngva Satans eftir rithöfundinn Salman Rushdie. Rushdie þurfti að búa í felum vegna þess að heittrúaðir múslimar hótuðu að ráða hann af dögum eftir útgáfu bókarinnar.

Breski miðillinn The Guardian greinir frá þessu.

Bók Rushdie, sem er Indverji, kom út árið 1988. Innblásturinn af henni var líf Múhameðs spámanns. Eftir útgáfuna setti leiðtogi klerkastjórnarinnar í Íran, Ayatollah Khomeini, fé til höfuðs Rushdie. Bókin var bönnuð í Indlandi eftir mikil mótmæli í landinu. En um 14 prósent landsmanna eru múslimar, eða um 200 milljónir.

Ráðist var á Rushdie í New York fylki í Bandaríkjunum árið 2022 og hann stunginn. Missti hann auga eftir árásina. En á þeim tíma hafði Rushdie hætt að lifa í felum.

Ástæðan fyrir því að Söngvar Satans er komin í hillurnar í Indlandi á ný er ekki aukin ást stjórnvalda á málfrelsi. Heldur snýst málið um skriffinsku. En upprunalega skipunin frá árinu 1988, í stjórnartíð Rajiv Gandhi, finnst ekki.

„Við getum ekki ályktað annað en að þessi skipun sé ekki til,“ segir í úrskurði dómstóls í Delhi, höfuðborgar Indlands.