Breskur munkur fékk svo gott sem óáreittur að misnota börn og unglinga áratugum saman þrátt fyrir ítrekaðar viðvaranir. Á þriðjudag í næstu viku verður itarleg skýrsla gerð opinber þar sem glæpir munksins, Thaddeus Kotik, verða útlistaðir og hvernig það mátti vera að hann náði að fremja þá óáreittur þrátt fyrir fjölmargar kvartanir.
Glæpirnar áttu sér stað í munkaklaustri á eyjunni Caldey út fyrir strönd Wales. Íbúatala eyjunnar er breytileg en auk munka í klaustrinu búa yfirleitt nokkrar fjölskyldu að staðaldri á eyjunni. Í dag búa þar um 40 manns og hafa íbúar tekjur sínar fyrst og fremst af ferðamönnum sem þangað koma. Kotik kom til eyjunnar á fimmta áratug síðustu aldar og gekk í klaustrið. Bjó hann síðan á eyjunni allt til dauðadags árið 1992. Hann þurfti aldrei að svara fyrir glæpi sína með nokkrum hæfi.
The Guardian fjallar um niðurstöður skýrslunnar en blaðamenn miðilsins fengu aðgang að henni fyrir opinbera birtingu. Í henni kemur fram að Kotik hafi þá áratugi sem hann bjó í klaustrinu tælt til sín börn með gjöfum til þeirra og foreldra. Þannig vann hann sér traust allra til þess að fremja myrkaverkin.
Það sem er mest sláandi er að svo virðist sem yfirmenn klaustursins hafi vitað af hneigðum Kotik en þrátt fyrir fjölmargar kvartanir og ábendingar var aldrei brugðist við og munkurinn stöðvaður. Fyrstu kvartanirnar gegn honum komu fram á áttunda áratug síðustu aldar en ábóti klaustursins gerði lögreglu ekki viðvart heldur veitti Kotik aðeins tiltal. Það gerði lítið til þess að stöðva níðinginn.
Þá er því varpað fram í skýrslunni að munkurinn hafi einnig útvegað öðrum níðingum aðgang að börnum. Fjórir menn sem hafa fengið dóm eða verið grunaðir um kynferðisbrot gegn börnum eru sagðir hafa dvalið um skeið á eyjunni, á mismundandi tímum, í boði Kotik. Dæmdur barnaníðingur að nafni Paul Asthon faldi sig til að mynda undir dulnefni á eyjunni í sjö ár en grunur leikur á að hann hafi tekið fjölmargar ósiðlegar myndir af börnum á eyjunni og dreift þeim til annarra barnaníðinga.
Fórnarlömb munksins hafa stofnað sérstök samtök, Caldey Island Survivors Campaign. Í viðtölum við börn sem lentu í klóm níðingsins hefur komið fram að mörg þeirra hafi verið misnotuð margsinnis sama daginn en munkurinn var duglegur að skipuleggja stranda- og skógarferðir með börnunum þar sem hann náði þeim afsíðis. Alls stíga sextán einstaklingar fram og eru til viðtals í skýrslunni um níðingsverk Kotik.
Fram kemur að yfirmenn klaustursins og aðrir munkar, sem að öllum líkindum vissu vel af glæpum Kotik, komu fram við mörg börnin af stækri fyrirlitingu. Eitthvað sem fórnarlömbin segja, nú á fullorðinsárum, hafi gert þjáningar þeirra enn verri.
Í dag búa sjö munkar í klaustrinu og hafa núverandi yfirmenn lýst yfir iðrun sinni hvernig haldið var á spilinum á síðustu öld.
