Í gærkvöldi og nótt var eins og venjulega á þessum tíma vikunnar nóg að gera hjá Lögreglunni á höfuðborgarsvæðinu.

Í dagbók hennar kemur fram að meðal annars hafi verið töluvert um heimilisofbeldis- og ágreiningsmál.

Meðal mála sem nefnd eru til sögunnar í dagbókinnni er að aðila var vísað út af neyðarskýli Reykjavíkurborgar sökum æsings. Tveimur klukkustundum seinna var sami aðili tilkynntur fyrir að hafa ráðist á annan skjólstæðing gistiskýlisins með flösku eftir að sá síðarnefndi sló hann. Þeir voru báðir mjög ölvaðir og ekki í ástandi til að vera meðal almennings. Voru þessir einstaklingar því vistaðir í fangaklefa.

Tilkynnt var um ágreiningur milli tveggja mæðra í Reykjavík. Á vettvangi reyndi lögreglan að stilla til friðar sem virtist vera að takast þegar önnur móðirin, sem var töluvert ölvuð, kastaði litlum hundi sem hún var með í fanginu í bringu lögreglumanns. Hundurinn var ómeiddur eftir kastið. Móðirin var að lokum handtekin og vistuð í klefa vegna nokkurra brota.

Líklega hefur hundurinn verið í eigu konunnar en það er þó ekki sérstaklega tekið fram.

Gömlu til ama

Í dagbókinni segir einnig frá því að tilkynnt var um tvo eldri menn sem voru til ama í miðborginni. Þeir neituðu báðir að gefa upp nafn og kennitölu og voru því handteknir. Þeir létu þó loks undan á lögreglustöðinni og gáfu upp þessar upplýsingar og var sleppt að því loknu.

Loks segir frá því í dagbók lögreglunnar á höfuðborgarsvæðinu að tilkynnt var um megna klórlykt á stigagangi fjölbýlisúss þar sem menn voru að hlaupa út úr íbúð í húsinu. Mikil ammoníaklykt var á vettvangi þegar lögreglan kom og var slökkvilið fengið til þess að reykræsta íbúðina. Húsráðandi sagðist hafa verið að úða skordýraeitri inni í íbúðinni til þess að drepa flugur en hann var síðan fluttur á sjúkrastofnun til frekari aðhlynningar af sjúkraflutningamönnum. Við skoðun í íbúðinni fundust vopn og nokkuð magn fíkniefna.