Verkalýðsfélagið Efling birti í morgun harðorða yfirlýsingu um kjarasamninga félaganna SVEIT og Virðingar og segja hið síðarnefnda vera svokallað gervistéttarfélag. Nafntogaðir veitingamenn eru innan raða beggja félaga.
DV og fleiri miðlar greindu frá málinu í morgun. En Efling varar fólk í veitingageiranum við Virðingu og hvetur til þess að ef fólki er boðið að taka þátt í „þessum svikum“ að það tilkynni beint til Eflingar. Efling geri kjarasamning við Samtök atvinnulífsins um kjör veitingafólks á höfuðborgarsvæðinu. Samningur sem SVEIT, félag sem sumir veitingamenn eru í, og Virðing feli í sér mikla kjaraskerðingu.
Þegar litið er á félögin tvö, SVEIT og Virðingu, sést að veitingamenn eru beggja megin borðsins.
Formaður SVEIT er samkvæmt heimasíðu félagsins Björn Árnason. Þar til fyrir skemmstu var skráður formaður Hrefna Björk Sverrisdóttir, eigandi veitingahússins ROK við Skólavörðustíg.
Varaformaður er Emil Helgi Lárusson, eigandi og framkvæmdastjóri Serrano. En hann á einnig Craft Burger Kitchen á Nýbýlavegi og fleiri staði.
Í stjórn er einnig Skúli Gunnar Sigfússon, betur þekktur sem Skúli í Subway, sem á einnig fleiri veitingastaði og fyrirtæki í ferðaþjónustu. Sem og Arinbjörn Þórarinsson, eigandi Greifans á Akureyri og fleiri staða, Birgir Örn Birgisson fyrrverandi forstjóri Domino´s og Eyþór Már Halldórsson eigandi Public House.
SVEIT leitaði eftir því í í september árið 2022 að semja við Eflingu. Efling vildi það ekki enda vildi SVEIT semja um lakari kjör en voru í gildandi kjarasamningi Eflingar og SA. SVEIT reyndi að þvinga Eflingu til kjaraviðræðna fyrir félagsdómi en höfðu ekki erindi sem erfiði málinu í nóvember árið 2023. Kjarasamningur Eflingar og SA væri bindandi sem lágmarkskjör fyrir starfsfólk veitingafyrirtækja.
Síðan hefur verið stofnað félagið Virðing sem Efling segir gervistéttarfélag. Það er félag sem hafi verið stofnað af atvinnurekendum og hafi ekki kjör verkafólks að leiðarljósi.
Ekki kemur fram hver sé formaður Virðingar en í stofngögnum félagsins sést að stjórnarformaðurinn er Jafet Thor Arnfjörð. Jafet er sonur Sigurðar Arnfjörð Helgasonar, eiganda og rekstraraðili Edinborg Bistro á Ísafirði.
Meðstjórnendur eru Jóhanna Sigurbjörg Húnfjörð, eigandi víninnflutningsfélagsins J. Húnfjörð og framkvæmdastjóri Kampavínsfélagsins og Jóhann Stefánsson, prókúruhafi Litlu mathallarinnar á Akureyri sem rekur veitingastaðina Slæsuna, Kvikkí, Lemon og Maikai en hann rak áður Hamborgarafabrikkuna á Akureyri.
Framkvæmdastjóri er Valdimar Leó Friðriksson. Varamenn í stjórn eru Herborg Sveinbjörnsdóttir rekstrarstjóri Mathúss Garðabæjar og Ronja Björk Bjarnadóttir. Ronja Björk er 18 ára dóttir Hrefnu Bjarkar Sverrisdóttur, sem áður var titluð formaður SVEIT sem skrifaði undir kjarasaming við Virðingu.
