„Það sýnist mér vera flókið,“ sagði Eiríkur Bergmann Einarsson, prófessor í stjórnmálafræði við Háskólann á Bifröst, er DV spurði út í stjórnarmyndunarmöguleika í augnablikinu í ljósi kosningaúrslitanna.
„Flokkur fólksins er í kjörstöðu, sýnist mér, getur myndað stjórn með Samfylkingu og Viðreisn og einnig til hægri með Sjálfstæðisflokki og Miðflokki. Mér finnst ekkert augljóst í þessu.“
Ljóst er að Samfylkingin, Viðreisn og Flokkur fólksins geta myndað meirihluta. Eiríkur telur hins vegar að erfitt geti reynst fyrir þessa þrjá flokka að ná saman um myndun stjórnar vegna krafna Flokks fólksins.
„Það er mjög langt frá þeirra kröfum um alls konar hluti, bótakerfi og annað, og yfir til annarra flokka sem nauðsynlega yrðu að vera í þessum ríkisstjórnum til að ná meirihluta. Það yrði erfitt að sætta sjónarmiðin frá Flokki fólksins til Viðreisnar og til Sjálfstæðisflokks líka. En stjórnmál eru list hins mögulega og tölurnar neyða fólk í samstarf.“
Eiríkur telur að Samfylking og Viðreisn nái auðveldlega saman en vandamál sé að finna þriðja flokkinn í samstarfið.
„Ég held að það sé ekkert vandamál fyrir Samfylkingu og Viðreisn að ná saman en þá vantar samstarfsflokk. Framsókn sýnist mér ekki duga, það hefði verið miklu einfaldara. Þetta bara dugir ekki,“ segir Eiríkur en Framsókn hefur of lítið fylgi til að þetta þriggja flokka mynstur nái meirihluta.
Eiríkur telur að Sjálfstæðisflokkurinn sé erfiður kostur sem þriðji flokkurinn í samstarfi með Samfylkingu og Viðreisn.
„Samfylkingin mun eiga mjög erfitt með að starfa með Sjálfstæðisflokknum þannig að það getur ekki orðið nema í einhverju neyðartilviki.“
Aðspurður hvort við fáum nýja ríkisstjórn fyrir jól þá reiknar Eiríkur ekki endilega með því.
„Mér finnst það ekki blasa við. Þetta gæti orðið snúið.“
Eiríkur bendir á að samkvæmt nýjustu tölum nái Samfylking, Viðreisn og Framsóknarflokkur naumum þingmeirihluta, eða 32 þingmönnum. „Þetta er kannski augljósasti kosturinn,“ segir hann.
