Í dag var þingfest mál yfir 16 ára pilti sem ákærður hefur verið fyrir að hafa orðið hinni 17 ára gömlu Bryndísi Klöru Birgisdóttur að bana á Menningarnótt þann 24. ágúst síðastliðinn.

Samkvæmt ákærunni átti árásin sé stað á bílastæði í Reykjavík en fjórar ungar manneskjur sátu í bílnum er ákærði kom þar að og braut hliðarrúðu bílsins. Hann veittist ítrekað að pilti sem var í bílnum með hnífi og stakk hann í öxl og brjóstkassa. Bryndís Klara flúði þá út úr bílnum ásamt öðrum farþega.

Ákærði gerði tilraun til að svipta stúlku sem sat þá enn í bílnum lífi með því að stinga hana í öxl, handlegg og hendi.

Hann veittist síðan að Bryndísi Klöru með hnífi fyrir utan bílinn og svipti hana lífi. Stakk hann hana í eitt skipti í holhönd og náði stungan í gegnum hjartað og inn að lifur.

Pilturinn og stúlkan hlutu töluverða áverka af árás ákærða en Bryndís Klara lést af völdum áverka sinna sex dögum síðar.

Héraðssaksóknari krefst þess að ákærði verði dæmdur til refsingar og greiðslu alls sakarkostnaðar.

Fyrir hönd aðstandenda Bryndísar Klöru er gerð krafa um miskabætur upp á 17 milljónir króna til handa hvors foreldris hennar, samtals 34 milljónir.

Fyrir hönd hinna ungmennanna sem urðu fyrir árás hins ákærða er krafist átta milljóna fyrir hönd hvors um sig, stúlkunnar og piltsins sem urðu fyrir hnífstungum og fimm milljóna fyrir hönd pilts sem var í bílnum er árásin var gerð.