Virknin í eldgosinu sem hófst í Sundhnúksgígaröðinni í gærkvöldi er nokkuð stöðug. Hraunið sem náð hefur að þekja stóran hluta bílastæðis Bláa Lónsins er enn á hreyfingu. Þetta kemur fram í nýrri tilkynningu frá Veðurstofu Íslands.

Í tilkynningunni segir að virkni í eldgosinu, sem er á milli Stóra-Skógfells og Sýlingarfells, virðist vera nokkuð svipuð síðan í morgun. Jarðskjálftavirkni og aflögun á gosstöðvunum sé mjög lítil.

Fyrstu mælingar bendi til þess að rúmmál kviku sem streymdi frá Svartsengi yfir í Sundhnúksgígaröðina sé tæplega helmingur af því rúmmáli sem flæddi frá Svartsengi í síðasta eldgosi sem hófst þann 22. ágúst. Nánari niðurstöður um það fáist á næstu dögum.

Hrauntungan sem runnið hafi yfir Grindavíkurveg og heitavatnslögnina vestan hans hafi haldið áfram að renna til vesturs. Um hádegi hafi hraunið náð inn á bílastæði við Bláa lónið og sé enn á hreyfingu. Framrásarhraði hraunsins hafi verið metinn rúmlega 100 metrar á klukkustund á milli kl. 12:09 og 13:35.

Þessi hraunbreiða hafi nú náð lengra til vesturs en hraunbreiður úr fyrri eldgosum.