Landsréttur hefur staðfest úrskurð héraðsdóms þess efnis að maður einn skuli sæta nálgunarbanni gagnvart fyrrverandi sambýliskonu sinni til mánudagsins 24. febrúar 2025. Er lagt bann við því að maðurinn komi á eða í námunda við lögheimili konunnar, á svæði sem afmarkast við 100 metra radíus umhverfis húsnæðið, mælt frá miðju þess. Jafnframt er lagt bann við því að hann veiti konunni eftirför, nálgist hana á almannafæri, hringi í hana, sendi henni tölvupóst, sendi henni skilaboð, eða setji sig á annan hátt í sambandi við hana.

Í úrskurðinum kemur fram að maðurinn hafi áreitt konuna með ýmsum hætti eftir að þau slitu samvistum. Hann kom fyrir hlerunarbúnaði á heimili hennar og hefur sent henni fjölmörg skilaboð á samfélagsmiðlum. Í skýrslutöku hjá lögreglu játaði maðurinn að hafa komið fyrir hlerunarbúnaði á heimili konunnar. Jafnframt neitaði hann að skrifa undir svokallaða Selfossleið, en það er yfirlýsing um að láta af áreiti.

Í september þurfti konan að hringja á lögreglu vegna áreitis mannsins við heimili hennar, hann hafði mætt þar um morguninn og barið á alla glugga. Hafði hann einnig áreitt hana látlaust fram að því.

Nálgunarbannsúrskurðinn má lesa hér.