Tyrknenska stórliðið Galatasaray gerir sér vonir um að fá að kaupa sóknarmanninn Victor Osimhen endanlega næsta sumar.
Frá þessu greinir tyrknenski miðillinn Sozcu en um er að ræða 25 ára gamlan framherja sem er hjá félaginu í láni hjá Napoli.
Osimhen hefur heillað á undanförnum vikum en hann hefur áður verið orðaður við stórlið eins og Manchester United, Arsenal og Chelsea.
Chelsea var nálægt því að fá Osimhen í sínar raðir í sumar en hann endaði á að krota undir hjá Galatasaray út tímabilið.
Osimhen er talinn vilja spila í sterkari deild næsta sumar en Galatasaray er vongott um að geta keypt leikmanninn endanlega.
Napoli heimtaði 100 milljónir evra í sumar en Galatasaray er tilbúið að borga 50 milljónir sem gæti reynst of lítil upphæð.
