Borussia Dortmund hrundi gegn Real Madrid í Meistaradeildinni í kvöld en leikið var á Santiago Bernabeu.

Dortmund byrjaði leikinn frábærlega og komst í 2-0 og þannig var staðan eftir fyrri hálfleikinn.

Real átti eftir að skora heil fimm mörk í seinni hálfleik og vann að lokum mikilvægan heimasigur.

Vinicius Junior skoraði þrennu fyrir heimaliðið og þá komust Antonio Rudiger og Lucas Vazquez á blað.

Arsenal vann sitt verkefni á Emirates en sjálfsmark Dmytro Riznyk tryggði heimaliðinu stigin þrjú.

Aston Villa hafði betur gegn Bologna 2-0 og PSG gerði óvænt jafntefli heima gegn PSV Eindhoven frá Hollandi, 1-1.

Juventus bauð upp á skelfilega frammistöðu á heimavelli og tapaði 1-0 gegn Stuttgart þar sem El Bilal Toure gerði sigurmarkið á 92. mínútu.

Sporting Lisbon vann þá lið Sturm Graz 2-0 og Girona lagði Slovan Bratislava, 2-0.