Erlendir dýraverndunarsinnar hafa stofnað undirskriftalista vegna dráps ísbjarnarhúnsins á Hornströndum. Sagt er að dráp ísbjarna sé aðeins gert til þess að spara pening.
Kanadískir dýraverndunarsinnar stofnuðu undirskriftalistann í gær á vefsíðunni Change.org. Þegar þetta er skrifað hafa 40 manns skrifað undir. Titillinn er „Réttlæti fyrir ísbjörninn sem lögreglan á Íslandi skaut.“
„Nýlegt dráp lögreglunnar á ísbirninum var algjörlega óásættanlegt. Tilkynningin kom frá einu manneskjunni sem var enn þá í sumarbústaðnum sínum og hún var örugg inni hjá sér,“ segir í færslunni með undirskriftalistanum. „Björninn var að róta í ótryggu rusli, vandamál sem hægt er að leysa með bjarnarheldum ruslatunnum.“
Er undirskriftalistanum beint til Umhverfisstofnunar og íslensku lögreglunnar. Sagt er að stefnan um að skjóta ísbirni í stað þess að reyna að bjarga þeim sé bæði barn síns tíma og einungis gerð vegna leti og til þess að spara pening.
Óskað er eftir því þessari stefnu verði breytt og að viðbragðsáætlanir verði gerðar um bjarnarkomur, það er til þess að bjarga þeim og koma þeim á öruggan stað.
Málið á Hornströndum sýni að þörf sé á áhættumati. Björninn, eða réttara sagt húnninn, hafi ekki skapað hættu heldur einungis óþægindi fyrir fólk. Lögreglan hefði frekar átt að bíða þangað til að hann færi eða beita einhvers konar aðferðum til að flæma hann frá staðnum sem hann var á.
Nefnt er að lögreglan í borginni York í Ontario í Kanada hafi hætt að skjóta villt dýr árið 2016 og algjör stefnubreyting hafi orðið hjá borgaryfirvöldum eftir það.
„Lögregla og náttúruverndarfulltrúar ættu að taka sömu ákvarðanir og velja samúð,“ segir í niðurlagi undirskriftalistans.
