Héraðsdómur Reykjavíkur hefur úrskurðað að Sjóvá-Almennar tryggingar hf. greiði embætti Ríkislögreglustjóra tæpar 3 milljónir króna auk dráttarvaxta vegna mikilla skemmda á lögreglubifreið sem átti sér stað árið 2018. Þá var tryggingarfélaginu gert að greiða Ríkislögreglustjóra 1,45 milljónir króna í málskostnað.

Forsaga málsins er sú að aðfaranótt 6. júní 2018 byrjaði ökumaður bifreiðar að blikka ljósum og flauta án afláts á lögreglubifreið sem stóð kyrrstæð á rauðu ljósi við Hringbraut í Vesturbæ. Skyndilega keyrði svo ökumaðurinn upp að hlið lögreglubílsins, „rétti upp löngutöng með ósæmilegum hætti,“ eins og segir í dómsorði og brunaði svo í burtu og það yfir á rauðu ljósi. Eins og gera mátti ráð fyrir hófu lögreglumennirnir þegar eftirför.

Lýsingarnar á henni eru æsilegar en ökumaðurinn brunaði á allt að 150 kílómetra hraða á klukkustund í gegnum borgina þar til að lögreglubifreið nr. 264, sem var af gerðinni Ford Explorer, var ekið utan í flóttabifreiðina við hringtorg í Mosfellsbæ. Þá loks náðu lögreglumennirnir að hafa hendur í hári mannsins.

Ökumaðurinn lést nokkrum árum síðar

Hann reyndist vera undir áhrifum vímuefna en fram kemur í dómnum að umræddur ökumaður er nú látinn.

Lögreglubifreið nr. 264 skemmdist mikið í árekstrinum og reyndist viðgerðarkostnaður nema tæpum 3 milljónum króna. Ríkislögreglustjóri taldi að sá kostnaður ætti að greiðast úr ábyrgðatryggingu flóttabifreiðarinnar sem tryggð var hjá Sjóvá en tryggingarfélagið var ekki á sama máli. Sagði fulltrúi tryggingarfélagsins að óumdeilt væri að sérsveitarmaðurinn sem keyrði lögreglubifreiðina hefði valdið tjóninu. Jafnvel þó það væri réttlætanlegt þá ætti tryggingarfélagið ekki að bera kostnaðinn af viðgerðinni á lögreglubílnum.

Dómari féllst ekki á þessa skoðun tryggingarfélagsins og úrskurðaði að tryggingarfélagið skuli bera kostnaðinn eins og áður segir.

Hér má kynna sér nánar dóm Héraðsdóms Reykjavíkur