Cesc Fabregas, fyrrum leikmaður Arsenal og Chelsea, er staðráðinn í því að Erling Haaland muni bæta þau met sem eru í boði í ensku úrvalsdeildinni og Meistaradeildinni.

Haaland er líklega besti markaskorari heims um þessar mundir en komst ekki á blað í markalausu jafntefli gegn Inter í gær.

Alan Shearer hefur lengi verið markahæstur í sögu úrvalsdeildarinnar en það met verður bætt að sögn Fabregas.

,,Þú veist að hann mun ná þessu. Hann mun bæta metið – hann skoraði ekki gegn Inter en hann mun skora þrjú í næsta leik,“ sagði Fabregas.

,,Hann er einstakur og í raun of góður. Hann spilar í svo góðu liði og fær alltaf pláss til að gera gæfumuninn í leikjum liðsins.“

,,Ég hefði viljað spila með svona góðum sóknarmanni á mínum ferli, þú þarft alltaf að vera á tánum til að glíma við hann.“