Á þriðjudag sprungu símboðar hátt í þrjú þúsund liðsmanna samtakanna með þeim afleiðingum að tólf létust og margir örkumluðust. Í gær var sjónum beint að talstöðvum liðsmanna samtakanna með þeim afleiðingum að tuttugu létust og meira en 450 særðust.
Talið er fullvíst að Mossad, leyniþjónustustofnun Ísraels, hafi komið sprengiefni fyrir í tækjunum áður en þeim var dreift til liðsmanna samtakanna fyrr á þessu ári.
Mikill ótti ríkir meðal almennra borgara í Beirút, höfuðborg Líbanons, vegna sprenginganna og óttast jafnvel óbreyttir borgarar að rafmagnstæki á venjulegum heimilum gætu sprungið. Á samfélagsmiðlum hefur allskonar orðrómum verið dreift um að ísskápar og jafnvel sólarrafhlöður muni springa næst.
BBC Newsday ræddi við konu, Ghida, sem er ósköp venjulegur borgari í Líbanon. Hún segir að allir séu að „panikka“ og fólk treysti sér varla til að vera við hlið raftækja.
„Við þorum varla að sitja í tölvunni eða vera með símana á okkur. Allt virðist hættulegt á þessum tímapunkti og það veit enginn hvað hann á að gera,“ sagði Ghida sem óttast að allsherjarstríð muni brjótast út. „Ég er hrædd um fólkið mitt. Ég er hrædd um borgina mína og landið mitt,“ segir hún.
Talið er fullvíst að forystumenn Hisbollah-samtakanna muni hefna sín með einhverjum hætti en óvíst er til hvaða bragðs þeir munu taka.
MailOnline ræddi við Andreas Krieg, prófessor við King‘s College í Lundúnum, sem segir ólíklegt að liðsmenn Hisbollah muni ráðast með beinum hætti að Ísrael.
„Það er ekki líklegt að þeir svari með einhvers konar loftárásum eða drónaárásum. Nú þegar Ísraelsmenn eru farnir að stunda leynilegan hernað er líklegt að Hisbollah muni svara með sama hætti,“ segir hann og vísar í hernað eða árásir sem ekki er hægt að tengja beint við viðkomandi ríki eða samtök.
„Það er óvíst að slíkar árásir verði gerðar í Ísrael því það gæti reynst mjög erfitt. En við gætum verið að tala um ísraelsk skotmörk erlendis – eða skotmörk gyðinga erlendis. Hisbollah er með mjög þétt net af fólki sem það getur unnið með og gert árásir á þessi skotmörk,“ segir hann.
