Snemma að morgni 19. febrúar braust Shamus Doyle, 34 ára, inn á heimili 75 ára manns í Newark á Englandi. Það er óhætt að segja að gamli maðurinn hafi látið Doyle finna hvar Davíð keypti ölið og væntanlega brýst Doyle ekki aftur inn hjá honum.

Sky News segir að gamli maðurinn hafi vaknað þegar Doyle var kominn inn í húsið og hafi óttast um öryggi sitt. Hann hafi hitt á Doyle á neðri hæðinn og lamið hann í höfuðið með flösku.

Doyle flúði þá af vettvangi en kom skömmu síðar aftur og ógnaði gamla manninum með múrsteini að því er kom fram fyrir dómi í Nottingham í síðustu viku.

Gamli maðurinn sagði honum þá að lögreglan væri á leiðinni og grýtti Doyle þá múrsteininum í gegnum stofugluggann og lagði síðan á flótta.

Lögreglan fann Doyle í nágrenninu og handtók hann.

Hann neitaði að hafa brotist inn og skýrði áverka sína með að hann hefði lent í átökum í nálægum almenningsgarði. En upptaka úr eftirlitsmyndavél og blóð á vettvangi sögðu aðra sögu.

Doyle breytti síðan framburði sínum og játaði innbrot, þjófnað, skemmdarverk og að hafa haft í hótunum við gamla manninn. Hann var dæmdur í tveggja og hálfs árs fangelsi.