Það borgar sig betur að berjast fyrir hagsmunum fyrirtækja en launafólks. Að minnsta kosti þegar kemur að eigin launatékka.
Útgerðin borgar mjög vel fyrir sína hagsmunagæslu. Samkvæmt álagningarskrá Ríkisskattstjóra hafði Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi (SFS), 4.586.468 krónur í mánaðartekjur árið 2023.
Litlu minna hafði Sigurður Hannesson, framkvæmdastjóri Samtaka iðnaðarins (SI). Hann var með 4.195.463 krónur á mánuði.
Sigríður Margrét Oddsdóttir, framkvæmdastjóri Samtaka atvinnulífsins (SA), hefur verið áberandi á árinu, enda var hún að skrifa undir langa kjarasamninga fyrir hönd sinna umbjóðenda. Hún fær líka ágætlega borgað, var með 3.993.286 krónur á mánuði í fyrra samkvæmt álagningarskrá.
Ferðamannastraumurinn er kominn á fullt aftur eftir heimsfaraldurinn og hefur aldrei verið umfangsmeiri. Þrátt fyrir það var Jóhannes Þór Skúlason, framkvæmdastjóri Samtaka ferðaþjónustunnar (SAF), með mun lægri tekjur en áðurnefndir lobbýistar. Það er 1.423.853 krónur á mánuði.
Fulltrúar launafólks höfðu almennt séð lægri mánaðartekjur en fulltrúar fyrirtækja. Það er ef undanskilin eru laun framkvæmdastjóra SAF.
Sonja Ýr Þorbergsdóttir stendur í stafni fyrir opinbera starfsmenn hjá Bandalagi starfsmanna ríkis og bæja (BSRB). Hún var með 1.702.223 krónur í mánaðartekjur í fyrra.
Ekki langt undan eru tveir landsþekktir verkalýðsforkólfar. Annars vegar Vilhjálmur Birgisson, formaður Verkalýðsfélags Akraness og Starfsgreinasambandsins (SGS) sem hefur verið mikið í fréttum vegna hvalveiðimála og falls Skagans 3x. Hann var með 1.645.191 krónur á mánuði árið 2023.
Hins vegar er það Ragnar Þór Ingólfsson, formaður VR stéttarfélags. Hann var með 1.631.883 krónur.
Nokkuð minna var hin róttæka Sólveig Anna Jónsdóttir, formaður Eflingar, með. Það er 1.233.338 krónur.
