Andre Onana markvörður Manchester United boðar það að hann muni taka nánast endalaust af áhættum í leik sínum í vetur.

Onana er á leið inn í sitt annað tímabil hjá United, það fyrsta var æði misjafnt. Onana átti góða leiki en átti það til að gera hræðileg mistök sem reyndust United dýrkeypt.

„Það sem fólk mun sjá í ár er að ég mun taka rosalega mikið af áhættum,“ segir Onana.

„Ég læt bara vita, verið undirbúin undir það að ég tek áhættu. Ég nýt þess að gera það,“ segir markvörðurinn frá Kamerún.

Hann segir það hluta af því að koma United aftur í fremstu röð. „Bestu lið í heimi taka áhættu, byggja upp spil sitt frá aftasta manni og skilja stöður sem koma upp.“

„Ég þarf að vera á tánum og skynja hlutina til að taka bestu ákvörðunina fyrir liðið. Ég mun taka mikla ábyrgð og ég er með þykkt bak til að að taka við því. Ég held að þetta verði gott tímabil.“