Mexíkó var ekki lengi að rífa í gikkinn og hefur ákveðið að reka landsliðsþjálfara sinn Jaime Lozano úr starfi.

Lozano er fyrrum landsliðsmaður Mexíkó en hann spilaði 34 leiki á sínum ferli fyrir landsliðið og skoraði 12 mörk.

Mexíkó ákvað að treysta á Lozano fyrir Copa America í sumar en eftir mjög slæmt gengi var hann látinn fara.

Lozano tók við Mexíkó fyrir um 10 mánuðum síðan en liðið datt úr riðlakeppninni á Copa á dögunum.

Þolinmæðin var engin hjá knattspyrnusambandinu sem bauð honum samning til ársins 2030 í fyrra.

Það var athyglisverður samningur en Mexíkó vildi nota Lozano sem aðstoðarþjálfara fyrstu þrjú árin og svo ráða hann endanlega til allavega ársins 2030.

Lozano hafnaði því boði og vildi fá að taka við liðinu sjálfur en því miður þá gengu hlutirnir ekki upp og er hann atvinnulaus í dag.