Ísdrottningin, athafnakonan og glamúrfyrirsætan Ásdís Rán Gunnarsdóttir er komin með 1.500 meðmælendur, sem er lágmarksfjöldi til þess að bjóða sig fram til forseta Íslands.

Hún bætist því í hóp Katrínar Jakobsdóttur, Jóns Gnarr, Ástþórs Magnússonar, Baldurs Þórhallssonar, Höllu Tómasdóttur, Höllu Hrundar Logadóttur, Arnars Þórs Jónssonar og Steinunnar Ólínu Þorsteinsdóttur.

„Stórum áfanga náð! Þetta var erfiðasti parturinn fyrir mig. Það eru kannski ekki margir sem gera sér grein fyrir því hversu stórt afrek þetta er. Það að kona úr mínum heimi hafi náð að komast inn á lista af topp tíu forsetaframbjóðendum,“ segir Ásdís Rán í samtali við DV.

„Þetta var auðveldara fyrir hina, enda allir tengdir inn í pólitík með einhverjum hætti og með reynslu og mikinn stuðning á þessu sviði frá flokksmönnum og hinum ýmsu hópum sem standa að baki þeirra. Næstu vikur verða hins vegar töluvert skemmtilegri fyrir mig þar sem sviðsljósið er mitt sérsvið og þar á ég vonandi eftir að fá að láta ljós mitt skína. Ég tek næstu skref með jákvæðni og æðruleysi að leiðarljósi og kem til dyranna eins og ég er klædd,“ segir hún kímin.

„Það eru öll meðmæli komin í hús já, ég ætla samt að halda áfram að þiggja meðmæli fram á lokadag til að vera örugg.“