Frægðarsól Sydney Sweeney rís hratt í Hollywood þessi dægrin enda hefur leikkonan glæsilega slegið í gegn í fjölbreyttum hlutverkum í sjónvarpsþáttunum Euphoria, The White Lotus sem og ofurhetjumyndinni Madame Web.

Í nýlegu viðtali við tímarit Wall Street J0urnal, þar sem hún fer yfir allskonar matarvenjur sínar og heilsuráð, segir Sweeney að hún sé þekkt fyrir að komast af með lítinn svefn. „Ég reyni að sofa eins lengi og ég get en ég er þekkt fyrir að komast af með mjög lítinn svefn í langan tíma,“ segir leikkonan.

Hún keyrir þó ekki í sig kaffi til að fúnkera á slíkum stundum en hún segist aldrei hafa drukkið þann vinsæla drykk. „Ég hef aldrei prófað kaffi. Ég drekk bara vatn,“ segir Sweeney.

Þá segist hún vera hrifin af allskonar morgunmat eins og granóla, beikoni og croissant en allskonar ber eru þó í mestu uppáhaldi.

Leikkonan býr ásamt kærasta sínum, kaupsýslumanninum Jonathan Davino í Los Angeles en saman eiga þau hundinn Tank en flestir morgnar hennar hefjast á göngutúr með honum.

Líkamsræktarkerfið sem hún fer eftir heitir SolidCore, sem er einskonar pílates og segist hún ekki geta mælt nógsamlega með því.