Íþróttavikan, sem kemur að venju út alla föstudaga, var með breyttu sniði þessa vikuna sökum landsleiks Íslands gegn Ísrael. Þáttastjórnandinn Helgi Fannar Sigurðsson er staddur í Búdapest, þar sem leikurinn fer fram og því var þátturinn tekinn upp með fjarfundarbúnaði þetta skiptið. Hrafnkell Freyr Ágústsson var á sínum stað í settinu og með þeim félögum var Hörður Snævar Jónsson.

Albert Gumundsson er í landsliðshópi Íslands sem mætir Ísrael í kvöld. Mál gegn honum var látið niður falla í vetur en á dögunum áfrýjaði kona sem kærði hann um kynferðisbrot niðurstöðunni.

Age Hareide landsliðsþjálfari hefur ekki mátt velja Albert í undanförnum landsliðsgluggum þar sem málið stóð yfir en það var ákveðið að taka Albert ekki úr hópnum þó málið væri komið upp á ný.

„KSÍ tók þá ákvörðun að ef niðurfellingu yrði áfrýjað áður en hópurinn var kynntur yrði hann ekki með. En af því það var búið að kynna hóp og reglurnar ná ekki yfir þetta var ákveðið að hann yrði áfram út verkefnið og að KSÍ myndi svo skoða þetta,“ sagði Hörður í þættinum.

„Mér finnst þetta allavega sanngjarnast gagnvart þjálfaranum þó það megi setja spurningamerki við allt hitt.“

Hrafnkell tók til máls.

„Af því hann er kominn út og búið að velja hann væri bara skrýtið að henda honum heim eða leyfa honum ekki að spila.“

Umræðan í heild er í spilaranum.