Óhætt er að segja að Jón Viðar Jónsson, leiklistargagnrýnandi og samfélagsrýnir, taki ekki undir með Eiríki Rögnvaldssyni, prófessor emeritus í íslensku, í gagnrýni hans á þau áform Birgis Þórarinssonar alþingismanns að beita sér fyrir því á þingi að sett verði skilyrði um kunnáttu í íslensku við veitingu leyfa til aksturs leigubíla. Segir Eiríkur áform Birgis bera vott um andúð á útlendingum.
Í nýrri færslu á Facebook-síðu sinni skrifar Jón Viðar:
„Æ,æ, að hann Eiríkur skuli alltaf þurfa að láta svona.“
Þar er Jón Viðar væntanlega að vísa til þess að Eiríkur hefur oft látið þau orð falla opinberlega að kröfur um íslenskukunnáttu fólks af erlendum uppruna ættu ekki að ganga úr hófi fram.
Jón Viðar telur ákveðna þversögn vera í málflutningi Eiríks:
„Hér segist hann vilja að öllum útlendingum sem hingað koma til starfa sé gert að læra íslensku – samt rýkur hann upp og óskapast yfir því að þeim útlendingum, sem fá hér að keyra leigubíl, sé gert skylt að læra íslensku. Og þykist ekki sjá að íslenskukunnátta þeirra hafi nokkur áhrif á ratvísi þeirra eða fjármálalæsi.“
Hvetur þingmenn til að hlusta ekki á Eirík
Jón Viðar lýsir því næst ánægju með áformin um að herða kröfur um íslenskukunnáttu leigubílstjóra:
„Ég hefði í hans sporum fagnað því að Alþingi skuli nú loks ætla að gera eitthvað i málunum og byrjaði á leigubílsstjórunum sem hver heilvita maður sér að eiga að vera liðugt mælandi á okkar göfugu norrænu tungu. En nei, því miður – Eirikur er einn þeirra sem alltaf eru að farast úr áhyggjum yfir því að við séum ekki nógu góð við blessaða innflytjendurna og flest okkar bölvaðir rasistar undir niðri.“
Að lokum hvetur Jón Viðar alþingismenn til að hlusta ekki á andmæli Eiríks:
„En kæru alþingismenn, ef einhver ykkar skyldi slysast til að rekast á þetta horn mitt – endilega ekki hlusta á hann Eirík, þó prófessor sé og hálærður í tungunni, því hér talar pólitíkusinn í honum, en ekki sá vandaði fagmaður sem sat mikilsvirtur á kennarastóli i Háskólanum á árum áður!!“
