Réttarhöldin yfir lögmönnunum Jurgen Mossack, Ramon Fonseca og 30 öðrum hófust ekki í vikunni eins og boðað hafði verið. Dómari í Panamaborg sagði viðstöddum á mánudag að réttarhöldunum væri enn og aftur frestað.
Lögmennirnir ráku lögfræðistofuna Mossack Fonseca sem var miðpunktur hneykslinu sem kallað var Panama-skjölin árið 2016 og sýndi að fjölmargir áhrifamenn heimsins áttu eignir í aflandsfélögum.
Fjölmarga Íslendinga mátti finna í Panama-skjölunum. Meðal annars þáverandi forsætisráðherra og fjármálaráðherra, Sigmund Davíð Gunnlaugsson og Bjarna Benediktsson. Hinn fyrrnefndi sagði af sér embætti í kjölfar málsins.
Mossack og Fonseca eru ákærðir fyrir peningaþvætti. Upphaflega óskuðu saksóknarar eftir því að 44 yrðu ákærðir í málinu en ákærur á hendur 12 einstaklingum voru felldar niður.
Réttarhöldin áttu að hefjast í desember árið 2021 en hefur í mörg skipti verið frestað. Réttarhöldin áttu að hefjast 19. febrúar og standa yfir til 8. mars. Nú hefur þeim verið frestað til 8. apríl og eiga að standa til 26. þess mánaðar.
