Kristín Jónsdóttir, eldfjalla- og jarðskjálftafræðingur, sagði rétt í þessu í samtali við RÚV að hætta sé á að gos hefjist í Grindavíkurbæ. Skjálftavirknin hafi færst inn undir bæinn síðasta hálftímann og svo virðist sem kvika sé undir honum.

Hún sagði að mesta ákefðin sé nyrst í bænum og það bendi til að kvika sé komin nær honum og að hún leiti í þessa átt, inn fyrir bæjarmörkin.

„Þetta er alvarlegt ástand og við viljum brýna alvarleika þessa máls. Það er mikil þörf á því að bregðast hratt við og rýma Grindavík strax,“ sagði hún og játaði að hún hafi áhyggjur af að gos geti hafist í bænum, innan varnargarðanna.