Fram er komið frumvarp þess efnis að tappar á plastílátum, svo sem gosflöskum, verði að vera áfastir flöskunni. Um er að ræða frumvarp sem byggir á Evrópureglugerð.

„Ákvæðið mælir fyrir um gerð og samsetningu tiltekinna einnota plastvara að því leyti að einungis megi setja einnota drykkjarílát og –umbúðir úr plasti með tappa eða lok úr plasti á markað ef tappinn eða lokið er áfast vörunni á meðan fyrirhuguð notkun hennar stendur yfir,“ segir í kynningu í Samráðsgátt stjórnvalda. En það er Guðlaugur Þór Þórðarson, umhverfis-, orku- og loftslagsráðherra sem leggur frumvarpið fram.

Tilgangurinn er að koma í veg fyrir að tappar og lok af einnota drykkjarílátum og umbúðum endi á víðavangi og úti í umhverfinu. Á þetta við öll drykkjarílát úr plasti sem innihalda þrjá lítra eða minna. Ekki gler eða málmílát.

Íslendingar hafa nú þegar fengið að kynnast hinu nýja fyrirkomulagi. Til dæmis byrjaði Coca Cola á Íslandi að selja drykki með áföstum töppum árið 2023. Enn þá er þó hægt að rífa tappana af flöskum Coca Cola. En það þarf smá átak til.

Ölgerðin hefur einnig lýst því yfir að til standi að gera sams konar breytingu á drykkjum fyrirtækisins.

Samkvæmt frumvarpinu tekur breytingin gildi þann 3. júlí næstkomandi.